Нұр-Сұлтанда балаға ең көп қойылған есімдер белгілі болды
Осы жылдың 11 айында елордада 32 мыңнан астам сәби дүниеге келді, бұл өткен жылдың сәйкес кезеңімен салыстырғанда үш мыңға көп
Нұр-Сұлтан әкімдігінің ресми сайты биыл жаңа туған нәрестелерге ең көп қойылған есімдерді жариялады.
2021 жылы Нұр-Сұлтанда қыздар арасында ең танымал есім Айлин болды. Бұл есім елордада дүниеге келген 437 нәрестеге берілді. Одан кейінгі орында – Медина, бұл есіммен 414 сәби тіркелді.
Ал ұлдар арасында Әлихан есімі қатты танымал. Жаңа туған 360 нәрестеге осы есім қойылды.
Қыздарға жиі қойылған есімдер
- Айлин,
- Медина,
- Айша,
- Әмина,
- Томирис,
- Аяла,
- Айзере,
- Раяна,
- Сафия,
- Асылым,
- Айару,
- Мәриям,
- Айым,
- Айша,
- Зере.
Жиі кездесетін ұл бала есімдері
- Әлихан,
- Әмір,
- Алан,
- Әли,
- Алдияр,
- Арлан,
- Омар,
- Альтаир,
- Айсұлтан,
- Санжар,
- Ибрахим,
- Ислам,
- Рамазан,
- Ерасыл,
- Арсен.
Әкімдік ақпаратынша, биыл қалада некені ресми тіркеген жаңа отбасылар саны да өсті. Есептік кезеңде 11 289 жұп отбасын құрды. 2020 жылы 9 571 неке тіркелген болатын.
Сарапшылардың айтуынша, қазір некеге тұруға және отбасын құруға жауапкершілікпен, саналы түрде қарайды. Бүгінде жас жұбайлардың орташа жасы – 26-28 жас, ал төрт-бес жыл бұрын ол 22-23 жасты құраған еді. Тек жастар ғана емес, сонымен бірге ересектер де – 50-60, тіпті 70 жастағылар да шаңырақ көтеріп жатады.
Аудандық әкімдіктердің АХАТ бөлімдерінің мәліметінше, 2021 жылдың 1 қаңтарынан 30 қарашасына дейін елордада 32 146 бала туу туралы куәлік алды. 2020 жылдың сәйкес кезеңінде қалада 29 083 сәби дүниеге келді.
