Түркістандық жігітке тұрмысқа шыққан тай қызы сиыр сауып, қазақ тілін үйреніп жүр
Жас отбасы қазір шетелде тұрады. Келешекте жастар Қазақстанға келіп, Алматы қаласында тұруды жоспарлап отыр
АЛМАТЫ, 17 мамыр – Sputnik. Түркістандық жігіт Рахат Әнапия мен тайландтық бойжеткен Корнканок Хачоктың неке қидырып, отбасы құрғанына бес жыл болды. Қазақ отбасына келін болған соң ислам дінін қабылдап, Гауһар есімін алған. Өткен жылы жас отбасы Қазақстанда той жасады, енді екінші той Тайландта өтеді. Алайда коронавирус пандемиясына байланысты уақыты кейінге шегерілген. Жастар қазір білім алып, тәжірибе жинақтау үшін шетелде жүр.
Sputnik Қазақстан тілшісі Рахат пен Гауһарға хабарласып, қалай танысқаны, екі жастың үйлену туралы шешімін жанұялары қалай қабылдағаны және отбасылық өмірі жайлы сұрады.
Тайландтан Түркістанға дейін
Рахат пен Гауһар 2015 жылы Америка Құрама Штаттарында Бостон қаласында бір жерде жұмыс істеп жүріп танысады. Ол кезде Рахат Америкаға Work and Travel бағдарламасымен барған еді.
